|
日本尋寶地 Recycle Flea Market 大公開
 |
 |
 |
|
| Flea market在世界各地其實早已是一個潮流指定發掘地，無他，因當中不單貨品價廉物美，而且更極有可能找到些喜出望外之物（如筆者就試過在泰國翟篤翟用港紙$100買LEVIS 501XX，抵到吖﹗），所以世界各地出名的flea market如倫敦的Covent Garden、Camden Market、巴黎的Saint -Ouen都是潮流人或時裝人必到之地，當然，身為潮流聖地的日本亦有著名的代代木公園，但其實據潮界日本通Meter Chan先生講，代代木公園經已面目全非，留下的，只有流浪漢賣垃圾，真係去都多餘，反之，現今日本年青人最流行的，是種集環保與Flea Market合二為一的跳蚤市場活動，整個模式與代代木相當接近，不過，此等活動因是由當地有關團體發起，整個活動會在指定地點、時間舉行，故整體較有秩序，更集環保、清理，同有少量幫補意義，是以深受一眾家中堆下大量潮流物而又唔捨得掉的年輕人棒場。是故，今次就同大家去睇睇此等新式環保跳蚤市場活動係咪真係咁堅，而今次地點就是東京後樂園，Let's GO﹗ 前半與眾同樂?後半高「潮」迭起 如果大家有行開flea market，其實憑經驗，見到現場氣氛，就知個場堅定流，而當小弟一行入當日嘅會場，講真，其實心中有多少暗叫不妙，因為……點解擺檔嘅人似一家大細？而行嘅人都又係一家大細？行多兩步見左邊有人賣旺角式內衣、右面賣車仔、前面賣冷帽頸巾、後面仲勁，即場同你堦骨推拿，咁點呀？係咪去錯家庭同樂嘉連華？心諗，呢次弊。當然，入得穴，又豈有退之理，便與攝影帥哥二人繼續心不安、理不得上路，好彩，絕處在頭兩排終結、生路在第三排檔口出現，因為……遠處，已經見到有件A Bathing APE tee同我打招呼，立即走上前探路，問價錢，結果打個突，果然，Meter Chan冇點我，真係唔該晒。 而自見到A Bathing APE開始，跟手其實遇見更多不同潮牌，價錢又幾打個突？先賣個關子，在此先不提價錢，先講講有咩筍貨？排名不分先後有Olive de olive、Nike、Adidas、Pony、Dr. Marten、Bandai、Bounty Hunter、Champion、Lomo、Vans等等，真的多得不能盡錄。而講番價錢，件A Bathing APE tee價錢係……登登登櫈……200日圓，冇錯，即係15蚊港錢，大家冇睇錯，我冇寫錯，抵到爛﹗咁其他呢？唔使多講，如果你有港幣500蚊兌換約4,000日圓入嚟，應該使唔晒，就係咁。而且，此地方仲有個好好玩嘅古代文明遊戲，就係講價，因為唔記得同大家講，後頁有小記同攝影帥哥之戰利品，當中Bounty Hunter拉鍊衛衣就係小弟用三寸不爛之舌由原本4,000日圓講到變2,500日圓嘅戰利品，可以只係用百鬆買到件靚衫，又講贏價，感覺絕對等同得到江山仲可以抱住美人，嗰種感覺真係……哈哈哈﹗ Recycle Flea Marketの戰利品 講真，嘢當然要做，但物又不得不買㺪，而且仲要咁平，又點忍得手呢，所以小記同攝影帥哥2人橫掃以下戰利品，埋單計數……哈哈哈﹗ ★Bounty Hunter拉鍊連帽衛衣 2,500日圓（約港幣$188） ★Lomo白色相機 1,200日圓（約港幣$90） ★古着連帽衛衣 500日圓（約港幣$38） ★古着桃紅色背心 150日圓（約港幣$10） ★古着美國大學Tee 100日圓（約港幣$7.5） ★公仔匙扣 共200日圓（約港幣$15） ★絕版HB鉛筆 共200日圓（約港幣$15） ★手造木製小貓咪公仔 共200日圓（約港幣$15） ★A Bathing Ape Tee 200日圓（約港幣$15） ★Nitro膠coin bag 100日圓（約港幣$7.5） ★絕版芝麻街皮禮士糖 100日圓（約港幣$7.5） ★藍色Retro布鞋 500日圓（約港幣$38） ★Patagoina fleece 2,500日圓（約港幣$188） Recyele Flea Market 買物決戰前準備 其實要去Recycle Flea Market好簡單，只要上網到日本雅虎搜尋"Recycle Flea Market"這個相關字，就會出現一大堆不同單位舉辦的賣物活動，而當中有好些是東京市內的，而有些則屬市外，當然選市內的為佳，因到跳蚤市場買物始終要碰運氣，好彩的，碰上大量珍貴稀有物，就算花車費及長時間到達，都抵番晒！但若然運氣唔好，搭個程回頭車一定谷到一肚氣，咁就口賴嘢啦！是以選東京市內的flea market是較好選擇。而當大家click入其中網址後，就會發現到活動有關細節如日期、開放時間、地址等資料，且更會有地圖及道路指引，教埋你搭咩車、邊個站出，極方便。而當中筆者則推介以下兩個網址，因一來位於東京區，交通方便，二來指引清晰之餘，更經常性會有活動，不妨作參考。 |
|
 |
|
| 網址： | http://www.recycler.org/ |
|
|
|
